Budi Daya 10

BUDI DAYA - MEI KARTAWINATA

saptu,21 mei 2022

Bismilahirohmanirohim - 

Budi Daya 10

Kalawan asmana Pangeran 

nu ngagaduhan sipat welas jeung asih.

Ieu kalimah oge cara nu disebut tadi di luhur, nya-eta pokna sakabeh ajian, 

sarta jadi patokan katauhidan ka Allah ta'ala sabab dina ieu kalimah oge 

netepkeun 

kana ayana asma jeung sipat 

nu Maha Suci 

(asmana nya-eta Allah sipatna Welas Asih), 

ieu kalimah oge kudu dibeuli 

ku tekad, ucap jeung lampah 

nu nyipatkeun kana sipat Gusti tea, 

nya-eta salawasna urang kudu milampah pagawean nu berdasar welas jeung asih 

ka sakabeh mahluk nu kapanjingan 

sipat ka welas kasihan Gusti.

Contona: 

nyaeta mandang kana adegan nu sejen 

kudu saperti mandang kana dirina pribadi, 

boh ka manusa atawa ka sato-sato, 

kana tatangkalan oge urang 

kudu neundeun eta persipatan, 

mun bisa mah, nenjo tangkal kagaringan oge urang kudu daek kalawan rido nyebor ku cai, supaya manehna sehat deui, 

malah dina putak petik bubuahan oge 

ceuk elmu galeuh (agama pohaci) mah 

kudu mipit amit ngala bebeja, 

da sanajan tatangkalan oge 

kajadian tina sipat Rohman-rohim 

Pangeran keneh, 

ngan bedana mah 

manusa boga pangawasa jeung kanyaho 

leuwih ti batan anu dicaritakeun di luhur, 

tah kulantaran eta sameujeuhna lamun urang leuwih berbudi tibatan mahluk anu sejen, atuh ulah nyieun talajak kakejeman, 

saperti nenjo sato anu lintuh hayang geura kop ngadahar, nenjo barang alus anu dipiboga 

ku batur sok hayang ngabogaan, 

atuh lamun kitu tetela urang leuwih hina 

ti batan anu jadi sato, 

nya kitu deui kecap Bismilahirohmanirohim teh sulaya jeung kalakuannana, 

sok komo ana nenjo nu sok bari mergasa nyawa batur ngucapkeun : 

"Kalawan asma Allah 

anu sipat welas jeung asih". 

Naha ongkoh nyaho yen kudu welas jeung asih, tapi ieu kalimah dipake maehan nu martabatna sahandapeun manusa? 

Naha teu leuwih hade lamun mergasa nyawa batur bari make kecap 

kalawan asmana ijajil anu sipatna 

luas jeung kejem?  

Tah ku sakituna katerangan bedana 

kecap jeung lampah Ta'udz 

(rek nyalindung ka Allah 

jeung ngajauhan kalakuan setan) jeung Bismilahirohmanirohim 

(muji kana asmana Gusti nu Maha Suci 

anu sipat WELAS jeung ASIH). 

Cindekna kieu : 

lamun Ta'udz 

"Abdi Gusti bade nebihan laku anu awon" ari Bismilahirohmanirohim artina : 

"Abdi Gusti bade welas asih 

ka sasama mahluk Gusti".

Jadi ayeuna urang bisa nimbang 

naha jaman anu bohong ? 

(Wereld is bedrog?) atawa anu ngajamannana anu bohong?

Komo ceuk dongeng anu bohong mah, bejana arek neluh atawa ngaganggaong oge jampena teh mimitina sok make kalimah Ta'udz jeung Bismilah heula, 

kupantes anu karitu lamun enya mah ayana naraka, pantes pieusiannana teh.

Ku katerangan di luhur geus tetela yen kalakuan sulaya tina maksudna kalimah, atuh geura mangga upama geus areling , 

prak atuh pilampah kalakuan nyalindung 

ka Allah 

sarta ngajauhan lakuning setan 

supaya bisa nyumponan 

muji kana asmana 

Wujud nu Maha Suci, 

sarta ngaenyakeun yen Pangeran teh sipatna welas jeung asih, 

nya kitu deui nu rumasa jadi umatna Allah 

pada daek mangeran ka anjeuna 

ku ngalakukeun laku lampah nu mikawelas jeung mikaasih ka sasama mahluk Allah 

anu babarengan pada ngumbara di alam dunya supaya bisa salamet 

ti dunya nepi ka akheratna, 

karana geuning kakara urang hirup 

dina rohman rohimna oge, 

tur kajasmanian ku sipating dunya 

(beureum, hideung, koneng, bodas) 

jeung lamun urang bisa nyingkah-an 

napsu setan sok tara jauh jeung katumaninahan, 

sok komo lamun urang bisa tunggal di anjeuna (Inna Lilahi Wa Inna Lilahi Roji'un), 

karana ku pamantesna rasa 

yen dina Wujudna Pangeran 

estu pinuh ku sagara rasa kani'matan (Rasullulah).